जेती देखबे तेती खांव खांव

जेती देखबे तेती खांव खांव 

गली मोहल्ला सहर अउ गांव गांव 

तहसील जनपद कोर्ट कछेरी

बुता पड़े म होथे देरी

पचायत हो या चौकी थाना

देखे बर होही त जरूर जाना

जम्मो जगा कोलबिल कांव कांव 

जेती देखबे तेती खांव खांव 

कोरोना के नाम ले कखरो पसीना छूटत हे

कखरो कनिहा टूटत हे

कतको मनखे हे तेमन जनता ल लूटत हे

अस्पताल म देखव त भीड़ हे भारी

नाक म दम करे कोरोना के बीमारी

बड़का अस्पताल के बड़का नाम

देखे म मिलत हे फेर नीचा काम

मारत हे जियत मनखे ल कखरो अंग ल निकारत हे

मरत हे मरीज नइहे लेहे बर सांस

सुते बर बेड नहीं छूटय जिनगी के आस

बचा ले डॉक्टर बता कतक़ा पैसा लांव

जेती देखबे तेती खांव खांव

बंद हे बाजार 

लोगन हे परेशान 

शटर हे बंद 

बेचात हे समान

कालाबाजारी मिलावट खोरी
काला काला गोठियाव

जेती देखबे तेती खांव खांव 

लोगन मरत हे दारू बिन

सरकार गोठियात हे

तभे तो घर घर दारु पहुँचात हे

पहुंचाना हे त घर घर दवई ल पहुंचा

काम कर बने अउ फ़ोटो ल खिंचा

अईसन सरकार तुंहर का महिमा गाव

जेती देखबे तेती खांव खांव

राम जाने दुनिया में का होही

खाये बर दाना नहीं अब लोगन दारू म मुँह धोही

पउवा अद्धी त कतको बॉटल ल पिहि

कतको ह देख देख मन मसोस रही

काम बुता बंद हे कंहा ले पैसा लांव

जेती देखबे तेती खांव खांव

सरकार के उदिम ल जम्मो ह जानो

पैसा के खेल हे ए बात ल मानो

दारू ल छोड़ घर घर वैक्सीन मंगाव

जेती देखबे तेती खांव खांव 

लिखेश्वर साहू
सौंगा
पोस्ट.गिरौद

9669874209