माटी बंदन

माटी  बंदन        

जम्मो पाठक संगवारी मन ला जय जोहार , संगवारी हो "मेरी कलम" से 'लेखन अभ्यास' के ए कड़ी म आवव सुघ्घर माटी महतारी के बंदन करन..जेन माटी मां हमन जनम धरेन,खेलेन, कूदेन, करम-धरम करेन ,जेन अपन कोरा मां अन-धन उपजाके  जम्मो पराणी के पालन पोषण करथे वो महतारी के वंदना...... 

                            करो बंदना मोर छईयां भुईंया, मोर माटी महतारी ओ

जय छत्तीसगढ़ महतारी

                  सुख दुख के चिन्हारी मोर छत्ताीसगढ़ महतारी

महानदी के लहरा सुघ्घर तोरेच चरण पखारय।
                  हरियर खेत मां धान के सुनहा बाली माथ नवावय
फूल फूलवारी घन अमरैया तोर हवय चिन्हारी ओ
सुख दुख के चिन्हारी मोर छत्ताीसग गढ़ महतारी

चिउॅं-चिउॅं 2, चिरई चुरगुन अमरइया मा चहकय
                दसमद मोंगरा गोंदा चंदैनी फूल फूलवारी महकय
बनकोयली हा कुहके मइया तोर करत हे चारी ओ
सुख दुख के चिन्हारी मोर छत्तीसगढ़ महतारी ओ

सुरूज नरायण सुत उठके तोरेच करथे पूजा
                तोरले बढ़के धरती दाई नइये कोनो दूजा
करय सिंगार तोर छइयां भुइयां इहां के बखरी बारी ओ
सुख दुख के चिन्हारी मोर छत्तीसगढ़ महतारी ओ

 बने पूजारी जम्मो किसनहा तोरेच सेवा बजावेै ,
                 जांगर टूटत ले मेहनत करके खेत मा अन उपजावै
मान बढ़ावै तोरेच मइया सुख दुख के तै चिन्हारी ओ
सुख दुख केे हिस चन्हारी मोर छत्तीसगढ़ महतारी


              छत्तीसगढ़ महतारी की जय ......



                                                    
                                                                                        रचनाकार 

                                                                                      लिखेश्वर साहू 

                                                                                 ग्राम-सौंगा,पोष्ट-गिरौद,

                                                                          तह-मगरलोड, जिला-धमतरी (छ.ग.) 
                                                                                         9669874209