उवत सुरूज के अंजोर

जय जोहार संगवारी हो ,
                       वइसे तो उवत सुरूज हर सबो संसार मां अंजोर बगराथे अउ एखर उजियार मां सबो पराणी अपन बुता मां लग जाथे अइसन में सबो जगह के अलग अलग दृश्य देखे बर मिलथे कतका मनोरम लागथे बिहनिया के बेरा, फेर हमर गंवई गांव के बिहान के चित्रण ही अलग होथे, त लेवव संगवारी हो आज के ए कड़ी मं उही बिहान के चित्रण....

                                              उवत सुरूज के अंजोर

            होगे गांव गली खोर
होगे गांव गली खोर संगवारी
होगे गांव गली खोर

•   होवत बिहनिया सुरूज जगमगावय

                                बंशी मंदिर के अउ शंख हा सुनावय
चिंउ चिंउ चिंउ चिंउ चिरइया करे शोर
गांव गली अउ खोर खोर

•  ओस के बुंद सुग्घर पेड़ के पतइया में

                         लागय मोती महर महके अमरैया में
सुग्घर भौंरा कस मन झूमे मोर                                    
गांव गली अउ खोर खोर

•  भुइयां के भगवान करम के गीत गावय

                                                लहर लहर सोनहा धान लहलहावय
गुंजे किलकारी लइका के चहुं ओर
गांव गली अउ खोर खोर

• चउंक मां लइका मन खेलत हावे बांटी

                          छुनुर छुनुर बाजे पनिहारिन के सांटी
गुंजगे जम्मों डहर जम्मो ओर-छोर
होगे गांव गली खोर....



                                                                                       रचनाकार 

                                                                                      लिखेश्वर साहू 

                                                                                 ग्राम-सौंगा,पोष्ट-गिरौद,

                                                                          तह-मगरलोड, जिला-धमतरी (छ.ग.) 
                                                                                         9669874209